رواية عائلة من جهنم الجزء الأول والثاني - أروى طاهر المسلاتي ( بنووتة الشيخ)

رواية عائلة من جهنم الجزء الأول والثاني - أروى طاهر المسلاتي ( بنووتة الشيخ)

رواية عائلة من جهنم

قصص ناس مختلفه جمعتهم في روايه وحده :-

قمر:تخيلي روحك فجآه تلقى نفسك عايشه بين عائله جديده عليك !!

عائله تعامل فيك انتى وامك وخواتك اقل الناس !!

تخيلي يكون جمالك هوا سبب دمارك!!

كل القصه بدت لما خشيت للحوش هاذا!..مش حوش لالا هاذي سرايه هاذي قلعه وكل الناس يلي فيها اول مره نشوفهم ..قلعه والحاكم فيها ضالم!!

شفت قدامي حجات كنت نشوف فيها في المسلسلات بس

خيانه،اعتداء،فقدان شرف!!ضلم طعن في الضهر من نفس العائله في بعض !

واقواها كانت قصه تااااانيه هيا يلي زادت صدمتي في العائله هاذي

__________________

اسمي قمر نقرا سنه ثانيه جامعه ❤️عندي زوز خوات وحده اكبر مني اسمها جيهان واختي الصغيره جنى تقرا في الاعدادي ..طبعا نحنا 3بنات بس معندناش شباب

اختي جيهان اكبر مني بي3سنين هاديه وتخاف من ضلها حتى حقها تسكت عليه

اما انا واختي جنى الصغيره فوله ونقسمت نصين الزوز طيور شر نعترف !

🔥رِوايـَــــاتْ بـــــَــــنـــو تــِةْ الشــِـــيـــــــخْ🔥

🔥أَروى الطــَـــاهـــــِرْ المــــســـلاتـــــــــي🔥

كانت حياتنا شبه طبيعيه ماما هيا يلي تخدم وتصرف علينا بمساعدات خوالي مره مره

بابا يطلع من الصبح ميروحش لعند الليل سكران💔

يرقد ع طول وتاني يوم ياخد فلوس من ماما غصب عليها ويطلع

رغم ان ماما كانت من الشرق وخوالي بعاد علينا لكن ديمه يبعتولنا في مساعدات ومهتمين بينا هلبا

كل يوم نفس الروتين كل يوم !!

نصبرو في ماما ونحاولو نكونو معاها وجنبها لانها بجد تتعب هلبا على خاطرنا ❤️...لين جي اليوم يلي غير حياتنا 180درجه!!

توفى بابافي حادث فجآه!!

كأنه حلم وقتها ..الحوش تعبا في لحضات والناس تعزي !

انا مش فاهمه شي ولا قادره نستوعب من الصدمه

خواتي منصدموش عادي جدا كأن يلي مات مش بوهم

ممكن لان كان معيشنا في جحيم ضرب وهزايب وخنبه ومشاكل!!

ماما كأن هم وانزاح من على قلبها💔

بس انا بكيت هلبا عليه بوي في النهايه!!

_________________

بسرعه مافاتت الايام كانو اهل ماما جنبنا ومعانا ❤️

عكس اهل بوي الله يرحمه !...لانهم مقاطعينا من سنين لان بابا عصي بوه وتزوج من الشرق وخالف قانون العيله يلي هوا لازم ياخد من بنات عمه

ولان يسكر وسمعته زي الزفت !!

المهم..فاتت شهور وايام وماما رمت العده وسكر بابا 9شهور متوفي

بدينا نجهزو في نفسنا لي السفر بنعيشو في الشرق جنب خوالي لان معش قدرنا على ايجار الحوش

لكن الصدمه كانت في جدي !!

جدي اب بابا حلف منطلعوش من حوشنا اإلا لي حوشه ولو ماما عارضت بياخدني انا وخواتي وهيا تمشي وين ما تبي ...بحجة ان ميبيش بنات ولده يتربو عند حد ويطلعو من بلادهم!

انصدمنا ومكناش نتوقعو شي زي هاذا لان جدي في حياته كلها ما جي شافنا الى في العزي بس!!

___________________

بعد ايام وايام وافقت ماما نمشو لي حوش جدي ونقعدو غادي !

وانا وخواتي رغم ان مش راضيين لكن مشيناهاّ عشان ماما .

_____________________

قمر:خذينا الشناطي يلي جهزناها وركبنا السياره مع ماما ومفيش حد نطق بي كلمه طول الطريق

بعد ساعه ونص درست ماما سيارتها وبدت تتكلم بهدوء

سمية : قبل مانخشو الحوش هذا ضروري نفهموا حاجات واجد

انتن بنياتي 3 يلي طلعت بيهن من هالدنيا ونبي انخش للعرب هذم عشانكن منبيش وحده فيكن تغلط في اي حاجه لأنهم يراجوا فينا ع سبله

جيهان:امي علاش تحكي عليهم هكي مرات هما كويسين

قمر:ونبي ضمي فمك ترا كان كويسين مش هاذا حالهم سنين محدش طق باب حوشنا الا توا

جنى:صح كلام قمر وهلبا مش شويه

قمر:اسكتي انتي بيبي قاعده متدخليش في كلام الكبار

جنى:😒😒

سميه:هيا انزلو

قمر:نزلت من السياره وقمت راسي مش مصدقه!!

هاذا هوا حوش جدي!!؟

ابدا مكانش حوش نهائي كأنه سرايه كبيره

اخر مره شفت حوش جدي كان عربي وقديم هلبااا

كان في شوية زحمه قدام الحوش !ومجموعة شباب مع بعض

قعدت نراقب فيهم واحد منهم عاطي بضهر ولابس اسود ...مفيش شي يبان من بعيد غير احيته يلي تلمع تحت الشمس!

ودخانه ..حسيت انه انتبه عليا بسرعه نزلت عيوني

وخشينا بخطوات ترجف واضح ان غصب علينا !

عيوني يقلبو في الحوش كله بي انبهار !

الجنان كيف وااااسع واشجار الزينه براا ...الحوش كيف كبير وكان فيه اكتر من بنايه فوقه ..

كان فيه ضي في كل مكان وخيمه في الجنان كبيرررره ..واضح انه عرس ❤️

جت عزوزه كبيره في السن واضح من السم من على وجها ..طبعا عمري ماننساها ولا ننسى كيف كانت تلز فينا ونحنا صغار ! مفروض ام الاب حنينه مش هكي !!

سلمت على ماما وتبحلق فيها من فوق لعند لوطه بعدين سلمت علينا ودخلتنا!! تلامحت مرا كبيره شويه ولما ركزت فيها عرفت انها مرت عمي لانها جت عزت في بابا ...خاشه تجري وتخبي في شي ماسكاته في يدها ...لاكن يلي خلاني نوقف في مكاني من الصدمه متبعتهمش

لما سمعت ولد صغيرون يقول لي اخته ...العروسه هربت !!😨...يتبع

رواية عائلة من جهنم الحلقة الثانية 2 - أروى طاهر المسلاتي ( بنووتة الشيخ)

سلمت على ماما وتبحلق فيها من فوق لعند لوطه بعدين سلمت علينا ودخلتنا!!...لاكن يلي خلاني نوقف في مكاني من الصدمه متبعتهمش

لما سمعت ولد صغيرون يقول لي البنت...العروسه هربت !!😨

قعدت واقفه في مكاني نراقب في البنت كيف ناضت تجري خشت داخل ...فقت على صوت امي تنادي فيا

سميه:قمر قمرر

قمر:جايه ماما ...

خشيت مع امي وخواتي للحوش وفمي مفتوح على وسعه!!

نتفرج ومش مستوعبه!!...الاثاث والارضيه الرخاميه يلي نشوف فيها وجهي

الثريه الضخمه يلي في وسط الحوش زي قصر عابدين😨

الدروج العالي يلي يرفع لي الدور الثاني!!

انا وخواتي نتبادلو في نفس نضرات الدهشه !

صالحه(حناهم ام بوهم):جيتو في عرس اكرام بنت سلفك

الحاج جهزلكم غرفتين فوق ليك ولي بناتك قسمو روحكم ...شبحت لي قمر وجيهان

الحوش هاذا فيه عمامكم الزوز وصغارهم بنات وشباب وزياده فوق الحوش هاذا4شقق لباقي عمامكم وصغارهم

قمر:في سرها...اووف قبيله

صالحه:يعني قلة ادب ودوه فارغه منبيهاش ونشوف حاجه عليكم نربيكم من اول وجديد

قمر:لا نحنا متربيين الحمد الله

سميه:قمرر..عيب سلم بنتي اسسس

قمر:سكتت بس وجعتنى الكلمه!!..مهما كان كرهم لينا بس نحنا كيف وصلنا !

صالحه:حموودي حموودي

محمد:نعم حنينا

صالحه:بساته..اركب فوق ارفعهم لي الدار الاخيره

كملت كلامها وهيا تشوف لي سميه..الدار الاخيره ويلي جنبها هما ليكم قسمو روحكم ...وباش تنزلو تحضرو الحنه والسهريه اليوم منبوش الناس يقولو الشرقاويه متعرفش في الاوصول هيا وبناتها

سميه:صابره بسيف ان شاء الله ...هيا بنات

____________________

قمر:خذت ماما وجيهان الغرفه الاخيره وانا وجنى الغرفه يلي قبلها ...كانت عرفتنا فيها زوز سراير لونها موڤ هااادي في الابيض ...دولاب وملحق صغير

كانت حلوه والوانها مريحه❤️

رتبنا حوايجنا ووقفت على الروشن نتفرج على الجنان وكيف بدت الزحمه !

وفي بالي كلام الولد الصغير على العروسه كيف هربت!؟؟

نشوف في شباب طالعين خاشيين واضح انهم من العيله!

ونشوف في نساوين واقفين يوشوشو لبعض

ونشوف في بنات لابسين حوايج يهبلو ومقعمزين يصورو مع بعض

واضح انهم بنات عمي يلي مريتهمش من لما كان عمري 7سنين !...رميت جسمي على السرير

ثواني ومعش نعلم بروحي 😴😴

🔥رِوايـَــــاتْ بـــــَــــنـــو تــِةْ الشــِـــيـــــــخْ🔥

🔥أَروى الطــَـــاهـــــِرْ المــــســـلاتـــــــــي🔥

قمر:فتحت عيوني على الباب يطق

جنى:قمر قمرر نوضي

قمر:تحك في عيونها..همم شنو ماما وين

جنى:نوضي المغرب ادن ...لو تشوفي لوطه المنضر يجنن وزحمه هلباااا تعرفي العروسه لابسه بودري

قمر:العروسه؟مش هربت؟

جنىنهربت؟؟خيرك قمر قاعده راقده ولا شنو !

قمر:مزلت من على السرير وقفت ع الروشن تتفرج وكان كلام جنى صح ...المنضر مش عادي❤️

الزينه والاضواء يهبلو وزحمة السيارات والشباب برا

والالعاب الناريه

جنى:سكرت الدولاب...قتلك ماما البسي حاجه باهيه وساوي روحك وانزلي

قمر:عيونها في الروشن...امي وجيهان وين؟

جنى:تساوي في شعرها...كيف نزلو توا

ماما لبست قفطانها الاحمر ...حطت جنى يديها في بعض ....الله نحس ان الحياه هني تجنن علاش كنتم خايفين

كان تشوفي لوطه الحلويات والمناضر وعندهم نافوراء مش مصدقه اني بنعيش هنايا

قمر:جت عينها في عين نفس الولد يلي شفاته قدام الحوش ..وخرت بسرعه وسكرت الستار

جنى:ولو تشوفي ال...

قمر:جنى خلااااص عاد نفختيلي راسي

جنى:انا الغالطه نحكيلك اقعدي فيها ...ونزلت

قمر:فتحت الدولاب ...ساعه ندور معنديش لبسه باهيه 🤦🏻‍♀️وامي كل شوي تشريين عليا وتزن فوق راسي

خديت سروال جينز ازرق داكن وسوريه بيضه كمامها مفتوحات

لبستهم ودرت شعري ضفرا ونزلت ...نتمشى بشويه ونتفرج مصدومه في الزحمه والحجات الفخمه يلي يفرقو فيها❤️

خشيت للخيمه كانت زحمه مفيش ولا مكان غير بداية الخيمه ومن اول ما خشيت عيونهم في شعري كلهم ...لان كان شعري لا فوق الركبه بشويه واسود🔥

قعمزت في الكرسي الفاضي وماما بعتتلي مسج

سميه:قيمي شعرك فوق

قمر:قمت شعري وقعدت نلف فيه فوق وهلبا ناس تراقب فيا بس ما اهتميتش..سرحت نتفرج ع الاجواء كانت حلوه❤️

اغاني زمزامات واضح ع هلبا ناس العز من لبسهم وكنت انا ابسط وحده فيهم لبستي عاديه جدا والعروسه لابسه بودري

مقعمزه تهدرز وتضحك ..واضح ان امورها تمام ليش قالو العروسه هربت!؟..قاطع صوت تفكيري بنت جنبي

سماح:انتي بنت الشرقاويه صح

قمر:ربعت يديها...اي

سماح:واكيد متعرفيش حد هنايا لو تحبي نعطيك تقرير مفصل عليهم

قمر:علاش انتي منو؟

سماح:مدت يدها..اسمي سماح جارت حوش جدك من 20سنه

قمر:بضحكه صفرا....تشرفنا

سماح:اول شي ...شوفي هكي ايوا بزبط

قمر:طاحت عينها على زوز بنات يصورو ويغنو

سماح:امانى وامينه صغار عمك سالم ..هاذم الزوز خوات سم صافى هما وامهم عندهم اخ اسمه مجد صايع وقح ومتع بنات مدلل جدك مدلعه غير شنو تبي

قمر:تحكي داخلها...الله كيف كبرو !!لدرجة معرفتهمش

سماح:شوفى يلي غادي

قمر:كانو 3بنات وامهم وحده منهم واضح عليها متزوجه

سماح:هاذم صغار عمك الهاشمي اريام متزوجه

وحوريه و وفاء ..حتى هما خبث ره ميغركش حد !

بس عندهم اخ اسمه غيث

غيث هاذا ماسكهم من رقبتهم ..تقدري تقولى ماسك العيله كلها ميقدروش يحكو معاه لان شغل جده وعمامه كله على راسه لما يتكلم خلاص صح يحترم في جدك وهكي بس حتى هوا ليه مكانه

قمر:رددت اسمه بشويه..غيث!!

سماح:اي اذكرتيه!؟

قمر:حاولت تذكر شكله ايام كانو صغار بس مقدرتش

سماح:توا قنين صراحه طول وعرض ولحيه وكل شي تبيه البنت الليبيه ههههههه

قمر:ابتسمت على هبل سماح وضحكها على ابسط شي ..وكملت سماح شرح العيله

كنت نعرف نساوين عمي لانهم جو عزو في بابا

نعرف ان عندي زوز نساوين عم كبار في السن والباقي نص عمر ومدايرين جو السلفات احزاب على بعض

___________________

بدت الزحمه تخف شويه شويه:-

وبنات العيله جهزو فراشات وسط الصاله وحنه ❤️

اجتمعو البنات كلهم وقعمزت العروسه في الوسط بدو يحنو فيها والبنات يغنو

جيهان:كانت متوتره من نضراتهم

كلهم يشوفولها هيا وخواتها وامها كأنهم حاجه غريبه ومش من العيله!

قمر:ناضت للمطبخ حطت كوب الميه ولما جت بترجع لي الصاله شافت جنى خاشه تبكي وشوية دم نازل من انفها

قمر:جنى😨خيرك من شنو هاذا !!

جنى:تتكلم ودموعها ينزلو....كنت مقعمزه مع بنات برا جي واحد ضربني مدرتله شي

قمر:من هًوا؟

جنى:تمسح في دموعها ...وين نعلم فرخ صغير

قمر:عقدت حواجبها ومسكت يد اختها وطلعت وهيا ناويه الشر...وينه الواطي

جنى:اشرت بصبعها ...هاذا

قمر:بدت تعيط عليه بصوت عالي وكان الفرخ يستفز فيها وهيا تزيد تعلي في صوتها لدرجة كانت خلاص بتمد يدها عليه لكن فجآه في شخص ادخل بينهم!!

قمر:كان نفس الولد يلي شبحته مرتين !...عيونه يخوفو ...عاقد حاجبه كأن متكنطي من شي

بعدني بيد وحده بس!!

يد وحده كانت كافيه ان تخلي جسمي كله يرجع للخلف!!

بمجرد ما وقف لاحضت كيف الفرخ خايف ...وناقص غير يبكي زي البيبي

تكلم بصوته العالي وهوا يهدد فيه لو مزال كلم وحده من البنات نهاره اسود !!

خافو كلهم الاولاد الصغار وطلعو من الحوش وهما يتمتو بشويه...غيث جي غيث جي

سكتت شويه وانا نشوفله يتباعد عليا وعاطيني بضهر ...عرفت ان كلام سماح كان صح!!

_____________________

اماني:شفتي الشرقاويه وبناتها؟؟!

وفاء:شفت يا بنت عمي

حوريه:محلاها البنت يلي لابسه السروال

كلهم شبحو لي حوري بمعنى كيف تشكريها؟!

حوريه:شنو تشبحولي جديات البنت طرف هاذا الانتاج الشرقاوي مع الغرباوي 😂❤️

امينه:مش هاذي قمر؟!زمان كانت مشفشفه وعبده

اريام:اففف ناقص حوش جدي عاهات زي هكي

جايبلكم صغار واخد سكار حشاش مش متربيين

مبعدكم صراحه انا خواتي وخايفه عليهم

اماني:ضحكت...حناي متبيهمش وماما وحتى مرت عمي يلي هيا امك متبيهمش !!

اريام:مقوى عينهم وجايين بكل ثقه

حوريه:طبعا ياماما في حد يقولوله تعالا للعز يقول لا؟!

اريام:صدقتي والله

اماني:تو تشوفي بنقعد وراهم لين نكرهم في عيشتهم ناقص غير فروخ الشرقاويه والسكار يقعدو معانا

سكتو كلهم وهما يشوفو لي جيهان وامها بنضرات واضح الشر فيهم!!

🔥رِوايـَــــاتْ بـــــَــــنـــو تــِةْ الشــِـــيـــــــخْ🔥

🔥أَروى الطــَـــاهـــــِرْ المــــســـلاتـــــــــي🔥

قمر:كملت دوشة الحنه وركبت انا وخواتي لي غرفنا

اما ماما قعدت لوطه تهدرز رغم ان مش مرغوب فيها وهيا عارفه الشي هاذا بس تحاول تخش فيهم

حطيت راسي ع المخده بعد ما بدلت حوايجي نذكر في تفاصيل يومي

الزمزامات والعروسه وسماح...ضحكت لما اذكرتها البنت هاذي كأن فيه طقه في راسها او شي 😂

لين اذكرت غيث!...تلاشت الضحكه من على وجهي لين اختفت

قعدت نفكر!!...بعد يكمل العرس كيف رح يعاملونا؟بدات غيث!!

كانت في خوف ورهبه منه منعرفش علاش!!

قعدت نفكر ونفكر لين غلبني النوم ورقدت

_______________________

اريام:حاسه ان يخون فيا وربي بنموت

امينه:يخون فيك؟؟هبلتي اريام؟كلنا نعرفو ان عبدو يموت فيك ودار المستحيل باش خلا جدي يوافق ان يزوج من برا العيله

اماني:صح كلام اختي علاش بيخونك لو يحبك؟

بعدين الحمد الله يلي تزوجتي برا العيله معش قعد حد إلا انا واختي وحسب قانون جدي يعني انا لي غيث خوك🤤❤️❤️❤️

امينه :وقت كلامك توا

امانى:انا بندير قهوا مدام كلهم راقدين وتو نحسبكم

اريام:شافت لي امينه وبدت تشكيلها لان امينه بنت عمها وصاحبتها يلي من لما صغار مع بعض وعمرهم ما درقو شي على بعض

تغير هلبا على بداية زواجنا ..معش يحب يحكى معاي زي قبل ديمه مشغول وديمه مع صحابه يشد في تالفونه بساعات

امينه:حاولى تفتشي تالفونه!

اريام:منقدرش طول الوقت معاه

امينه:مسكت يدها ...انتى توا هدي روحك

استمتعى بلعرس وبعد يكمل نشوفو حل للقصه هاذي

اريام:حطت يدها على بطنها يلي كيف باديه تكبر وتنهدت...ان شاء الله

امينه:توا ارتاحي لان بكرا نوضه بكري ومزين

اماني:خشت وهيا ماسكه سفره فيها اميه سخونه ونسكافي وشوية من حلويات العرس...لا ياماما انتي وياها نوضو اشربو معاي فرخه حريه ووفاء خاينين الكلاب ع اساس بيسهرو رقدو من الساعه 2

عدلت اريام تقعميزتها وبدت هيا وامينه واماني يشربو ويهدرزو طول الليل

____________________

جيهان:كيف كان الجو لوطه؟!

سميه:كويس

جيهان:شافت لي امها بنضره مش مصدقتها

سميه:خذت نفس..مش كويس واجد لكن لازم نتحملو عشان الامور تمشي

جيهان:تمنيت لو سافرنا لشرق عند خوالي

ع الاقل نرتاحو غادي

سمية : العنصريه قاعده هنا ولا غادي !

حتى هل خوالك غادي تو تلقي العرب تحكي عليكم بالغلط

جيهان:مش مطمنه للايام الجايه شايفه كيف يشبحولنا !؟وكيف يحكو واضح انهم مش ناويين على الخير ...تعرفي شنو

ياريت هربنا وخلاص

سمية : ضحكت...بلكي فيها خيرة لنا نا وياكن ارقدي تو بكرا حفله بعدها هه شوفي خشينا عليهم بالافراح

جيهان:ههههههه

سميه:ارقدي سلم بنتي ومعش تفكري واجد

____________________

اماني:تاكل...مبكري فرخ امل الصغير خلعني

قالي العروسه هربت ...وانا وين تلقونى قمت قفطاني وجري لي الدار 😂😂😂

اريام:وعلاش بتهرب ياحسره

اماني:وين نعلم ...خشيت لقيتها تمشط في شعرها كيف طالعه بي البودري

امينه:صغار امل مفلحهم في الكذب بكل مش متربيين

اماني:شافت لي اكرام(العروسه)وكانت راقده ❤️...خفت يكون مأثر عليها شي من يلي صار وهربت جديات

اريام:لا عاد انتي خيالك واسع هاذا يصير في المسلسلات مش هنايا ...هيا بنوض نرقد انا

امينه:حتى انا خلاص

____________________

اكرام:كنت مسكره عيوني ! ع اساس اني راقده ..يديا ورجليا محنيات

مش مصدقه اني العروسه !!

مش مصدقه انى قدرت نتخطا علاقة حبي الفاشله ونرجع نحب خطيبي

ااااه كله بسبب جدي والقانون متعه ..خلاني نتعلق بي ولد عمي ونحبه خشينا في علاقه ع اساس يكون نهايتها زواج!

بس صدمنا جدي لما جابلي عريس وطبعا حتى هوا من اقاربنا بس من بعيد💔

يلي قهرني ان ولد عمى مدارش اي ردة فعل !!

متكلمش حتى!...اكتفى بكلمة ربي يهنيك

بكيت ايااااام وليالي على كل شي صار

لعنت العيله كلها لعنت جدي والقانون متعه لعنت الحوش يلي مخلي وجهي في وجه ولد عمي طول الوقت

الحوش يلي خلا ولد عمي يشوفلي كيف نجهز لي فرحي💔

بس الحمد الله ..لما عطيت فرصه اي خطيبي طلع انسان كويس!وقدرت نتأقلم معاه

موصلتش لدرجة الحب نعترف ...بس نقدر نقول معزه ..معزه تخليني نقدر نعيش معاه ايامي الجايه

منعرفش ليش اليوم اذكرت كل شي صار معاي !!

ممكن لان اخر يوم ليا في الحوش ...او بي الاصح اخر يوم ليا في السجن هاذا

___________________

ثاني يوم⛅️⛅️⛅️

قمر:مفيش داعي نحكيلكم شن صار من بداية اليوم

لان تقريبا المنضر صاير في كل حوش ليبي

مفيش حد مهنم بي شي غير شعرهم ولبسهم ومكياجهم لكن انا وخواتي انهلكنا💔

ماما طول الوقت نوضي قمر للمطبخ جيهان ساوي الصاله جنى ساوي قدام لحوش ...كأنه خدم

كنت عارفه ماما ادير هكي عشان تكسب رضاهم وعشان منحسوش ان حنى غريبين لكن بجد تعب كل شي علينا !...وفي الاخر قاعدين نفس نضرات الاحتقار لينا 🤦🏻‍♀️

اذن المغرب ونحنا كيف خشينا بنوتو روحنا رغم ان كلهم واتين!!

لبست قفطان بيج حاير طوله ودرت مكياج خفيف

رسمت حواجبي ورسمة عين تكبرلي عيوني شويه

وبعد الف جهد وجهد ماما خدتني نفتح شعري بعد ما بخرتني الف مره!🤦🏻‍♀️

جيهان:لبست قفطان تركي بسيط لونه ابيض قصير

قامت شعرها كأن تسريحه مع كندره كعب لونها حمراء واكسسوار بنفس اللون ❤️

طلعو البنات ال3مع امهم لي السياره ولان امهم تسوق معبتش على حد يرفعهم وطلعت بروحها

عشان تغير نفسيتهم شويه ولعتلهم اغاني في الطريق وجنى وقمر قريب هبلو في السياره 😂

🔥رِوايـَــــاتْ بـــــَــــنـــو تــِةْ الشــِـــيـــــــخْ🔥

🔥أَروى الطــَـــاهـــــِرْ المــــســـلاتـــــــــي🔥

قمر:وصلنا لصاله ماما وخواتي خشو وانا واقفه نساوي في شعري ..سمعت صوت جنبي

قعدت نشوف في المرايا ع اساس نساوي في روحي لكن نخطف في نضرات مره مره

كانت مرا كبيره في السن شويه نعطيها جو ال40سنه هكي !

تتكلم في التالفون وطاحت في وذني كم كلمه ..حبيبي وياعمري

لما تلفتت المرا وبان وجها عرفت انها مرت عمي !

انصدمت وضحكت...قلت في خاطري الله الله

عمي قاعد رومنسي معاها

طلقت شعري ورا ضهري ولما جيت بنطلع صدمتنى وهيا تقول

اليوم نكلمك فيديو يا عمري !!

قمر:معش قدرت نكمل طريقي!!!

صدممممه!؟...لو كانت تكلم في عمي جديات ليش بتكلمه فيديو ؟...لالالا قمر هاذي مرت عمك مش وحده مراهقه !!

ممكن انتي سمعتى غلط او شي؟!...وكملت طريقها

قعمزت جنب امها وعقلها يرفع ويجيب

____________________

اماني:اختشي العروسه😂...المصوره وصلت

اكرام:واقفه بي الڤيلو متاعها❤️زي العسل طالعه

امها جنبها تبخر فيها

اكرام:خايها تخش

اماني:تفضلي

المصوره:خشت وكان واضح على وجها الارتباك !!

سلمت على اكرام وقعمزت

اكرام:استغربت...وين نجلاء؟

المصوره:نجلاء صارلها ضرف انا جيت بدلها متخافيش تصويري حلو

اكرام:لا عادي حصل خير

المصوره:معليشي عميمه نبي اكرام بروحها شوي بناخدلها لقطات هنايا

خديجه(ام اكرام واماني وامينه):تمام هي ..وخشت المبخره وطلعت

________________

جيهان:قعدت مقعمزه جنب ماما ونتفرج على بنات العيله

كل وحده قفطانها ومكياجها اقوى من يلي قبلها

واضح نضرات الناس لينا وليهم

كأنهم يقارنو فينا ببعض!!وحنى مليناش اي علاقه ببعض غير اللقب بس!

سموثى وترافيل وماعين ع الطاوله من افخم مايكون ❤️

كان بوي الله يرحمه ديما يحكى ان قوانين حدي صاعبه مش اي حد يقدرها

بس يلي نشوف فيه ان العيله كلها عايشين متريحين والامور تمام!!

______________

قمر:مرات عمى بايت برا وتبي تكلمه فيديو ...افففف عقلي مشوش

سميه:وين على خير؟

قمر:تو نجيك ماما نساوي وجهي ونجي

سميه:اخخ من ها الصبايا وخلاص

قمر:طلعت من دوشة القاعه والاغاني وقفت قدام المرايا نشوف لي روحي ...سمعت صرخات

وفاء:شنوو تقولي نهاري اسووود ..وطلعت تجري من غرفة العروسه خشت للقاعه

قمر:قربت شويه من غرفة العروسه وتشوف حوريه حتى هيا طالعه وجها ميتفسرش ...قربت قمر وهيا مش فاهمه شي

لين خش غيث من باب الصاله .

قمر:تجمدت في مكاني ..بلبسي هاذا وشعري يلي من دون حجاب شافلي بنضره خاطفه وخش للغرفه بدون ما يعطي اهتمام .

كانت الاوضاع متفركسه وزادت صدمتي لما طاحت عيني على اماني تخبط على وجها وتقول العرس إلتغي إلتغي ...يتبع

رواية عائلة من جهنم الجزء الثالث والرابع - أروى طاهر المسلاتي ( بنووتة الشيخ)